Matarreikningar lækka.

Matarreikningur vísitölufjölskyldunnar lækkar um tæpar 50.000 krónur á ári ef tillögur matvælanefndar forsætisráðherra ná fram að ganga. Ekki er samkomulag um að fella niður tolla af innfluttum landbúnaðarvörum. Nefndin mun væntanlega skila forsætisráðherra niðurstöðum sínum á næstunni.

Forsætisráðherra skipaði nefndina í upphafi ársins og í henni sitja fulltrúar stjórnvalda, vinnumarkaðarins og bænda. Megin verkefni hennar var að leggja fram tillögur um að lækka matvælaverð og færa það nær því sem gengur og gerist í nágrannalöndunum.

Nefndin koma saman í gær og líklega er það síðasti fundur nefndarinnar. Nú er verið að leggja lokahönd á skýrslu nefndarinnar, sem verður afhent forsætisráðherra á næstu dögum og í framhaldi af því kynnt opinberlega.

Eftir því sem næst verður komist náðist ekkert samkomulag um niðurfellingu tolla af innfluttum landbúnaðarvörum sem Alþýðusambandið ásamt fleirum í nefndinni hafa lagt mikla áherslu á að gert verði. Hins vegar verður sjónarmiðum nefndarmanna lýst í skýrslunni og gert ráð fyrir að með því verði lagður grunnur að áframhaldandi umræðu um málið. Það kemur því í hlut ríkisstjórnar og stjórnmálamanna að taka af skarið.

Hins vegar er samstaða um beinar tillögur sem eru í fjórum liðum: Vörugjald á matvælum verði lagt niður. Sú aðgerð mun hafa 0,6% áhrif á neysluvísitöluna eða lækka matarreikninginn um 22.000 á ári. Þá verða allar matvörur með 14% virðisaukaskatt. Nú bera um 20% matvara fullan virðisaukaskatt, það eru einkum gosdrykkir sælgæti og kex. Þessi breyting hefur 0,2% áhrif á vísistöluna. Þá verður virðisaukinn í veitingahúsageiranum einfaldaður og færður niður í 14%.

Samanlagt þýða þessar tillögur; niðurfellingu á vörugjöldum og breytingar á virðisaukaskattinum, að matarreikningur meðalfjölskyldu lækkar um 50.000 krónur á ári miðað við verðlag síðasta árs. Að lokum er samstaða um að hrófla ekki við matarskattinum svokallaða og að hann verði áfram 14%.

Í skýrslu nefndarinnar eru nefndar ýmsar aðrar leiðir til að lækka matarverðið meðal annars á sviði samkeppnismála.

Heimild: www.ruv.is