Framsóknarleiðtogar í framboði.

Leiðtogar í Mosfellsbæ, Marteinn Magnússon og Helga Jóhannesdóttir.

Leiðtogar í Reykjavík, Björn Ingi Hrafnsson og Óskar Bergsson.

Leiðtogar í Hafnarfirði, Sigurður Eyþórsson og Fjóla Halldórsdóttir.

exbé!

Hver er daman?

Hún er mjög þekkt, á yngri árum var hún ósigrandi í íþróttum og hefur gaman af skák!

Hljómsveitin VESPRÉ.

Að ofan hljómsveitin VESPRÉ, hún kom sá og sigraði á fyrri hluta 9. áratugar síðustu aldar. Poppheimurinn var ekki samur á eftir.

Þrátt fyrir vatnaskil þess tíma virðast sérfræðingar hafa haldið umfjöllun um sveitina í algjöru lágmarki.

Nýtt framsóknarfélag stofnað í borginni.

Nýtt Framsóknarfélag, Þjóðmálafélagið Akur, hefur verið stofnað í Reykjavík. Anna Kristindóttir hefur í fréttum látið hafa eftir sér að þessu nýja félagi sé ætlað að koma á öflugu félagsstarfi og sýna fram á að hægt sé að skiptast á skoðunum án þess að menn séu þá beinlínis í flokkadráttum sem gætu falið í sér að auka á deilur og tortryggni.

Þessu ber að fagna og hlakka ég til að fylgjast með framhaldinu.

En mig langar aðeins til að velta fyrir mér nafni þessa félags, Akur. Í orðabók Menningarsjóðs segir: 1 ræktað sáðland: kornakur, kartöfluakur; túnið er allt einn akur, þ.e. kafsprottið; afleidd eða huglæg merking er fara eins og logi yfir akur, þ.e. breiðast út mjög hratt (um frétt, farsótt o.fl.). 2 mergð, urmull.

Og nú er Akur orðið Þjóðmálafélag, það eru spennandi tímar framundan.

Manntafl í rífandi stemmingu í Ráðhúsinu.

Á þriðjahundrað manns urðu vitni að rífandi stemmingu á hraðskákmóti Skáksambands Íslands í Ráðhúsinu í gær. Eftir að um annað hundruð skákmenn höfðu att kappi í fyrradag, var komið að úrslitaeinvígi Magnúsar Carlsen og Hannesar Hlífars Stefánssonar. Spennustigið var í hámarki í Tjarnarsalnum, eftirlæti margra, Magnús og einn af sonum Íslands Hannes Hlífar voru sestir við háborðið. Skákdómari tilkynnti að hefja skyldi taflið og áhorfendur þögnuðuð.

Úrslit urðu á þann veg að Magnús vann báðar skákirnar og því óumdeildur sigurvegari mótsins, sem hann var mjög vel kominn af. Hafði hann m.a. unnið heimsmeistarann í hraðskák, Viswanathan Anand. Eftir það einvígi var gaman að fylgjast með litlu systur Magnúsar, er hún sýndi með báðum þumalfingrum velþóknun sína á afreki stóra bróður og uppskar breitt bros hans. Þau taka greinilega þátt í þessu með honum af lífi og sál.

Þátttöku undirritaðs lauk fyrri dag keppninnar, hefði orðið að lenda 60 sætum ofar til að komast í 64-manna úrslit, þannig að maður var langt frá sínum villtustu draumum, enda sumir draumar varla raunhæfir!

Andstæðingur minn í 1. umferð komst þó nokkuð langt, enda minnir mig að hann sé fyrrum ólympíufari fyrir Íslands hönd, Jón Garðar Viðarsson. Í 64-manna úrslitum tefldi hann gegn Inna Gaponenko, stórmeistara kvenna, og vann 1½-½. Í 32-manna úrslitum tefldi hann gegn stórmeistaranum Pentala Harikrishna sá er 19 ára frá Indlandi og feikilegt efni í ofurstórmeistara. Það reyndist of hár veggur að klífa.

Mér á vinstri hönd einmitt í þessari 1. umferð var ung skákkona Turkan Mamedjarova frá Azerbaijan, fædd 1989 og er alþjóðlegur meistari kvenna. Hún komst í 32-manna úrslit og tefli þá gegn sterkustu skákkonu heims, Judit Polgar. En það reyndist henni um megn. Hafði Guðfríður Lilja, forseti Skáksambandsins, hent gaman af því að Judit hefði núna 2 heila, enda komin 5 mánuði á leið!

Mamedjarova þessi á eldri bróður, Shakhriyar Mamedyarov. Sá er núna í 15. sæti á Fide-listanum, fæddur árið 1985, eða sama ár og Kasparov varð heimsmeistari í fyrsta sinn. Verður spennandi að fylgjast með þeim systkinunum. Í framhjáhlaupi má geta þess að ég horfði á Mamedyarov tefla gegn Nataf, frönskum stórmeistara, með aðeins 30 sekúndur gegn 4 mínútum Frakkans og vinna samt!!

Að lokum skal stjórn Skáksambandsins þökkuð frábær skemmtan.

Íslensk velmegun og kraftur eru öfundarefni nágrannaþjóða.

Viðbrögð Valgerðar Sverrisdóttur í fréttum í gær voru góð. Þar rakti hún að þeir hlutir sem hafi mjög mikil áhrif á efnahaginn hér og séu grundvallaratriðið væri mikil lántaka viðskiptabankanna og útlán, mikil sala á skuldabréfum í íslenskum krónum og sem sé komin yfir 200 milljarða og frá áramótum einhverjir 70 milljarðar.

Í Kastljósþætti í vikunni kom fram í máli Guðmundur Ólafssonar að það sem valdi mestu um þenslu hér heima, séu lántökur innlánsstofnana erlendis til að lána síðan til húsnæðiskaupa. Þetta væru orðnir um 250-300 milljarðar og því langsamlega stærsti faktorinn. Jafnframt sagði hann að innstreymi í hagkerfið vegna Kárahnjúka séu kannski 12–15 milljarðar á ári á móti hinu öllu.

Guðmundur sagði jafnframt atvinnuvegina ganga mjög vel og við ættum líka náttúruauðlindir sem við gætum nýtt áfram og því sé engin ástæða til þess að fara á límingunum þó einhverjir drengir úti í Bretlandi séu að skrifa einhverjar skrýtlur. Enda eins og Guðmundur sagði hreint út að þetta væru nú mikil jól hjá þeim hagfræðingunum núna. Hann væri búinn að hlusta á eina fimm í fjölmiðlum með öðru eyranu og þeir segðu nú svolítið sitt hvað.

Það er rétt hjá Valgerði að íslensk velmegun og kraftur eru öfundarefni nágrannaþjóða. Ungir Íslendingar sem eru að hasla sér völl á viðskiptasviðinu t.d. í Danmörku segja það blákalt að ungir Danir séu bara latir.

Annað. Halldór Ásgrímsson var í viðtali hjá BBC-WORLD SERVICE í gær. Ekki á hverjum degi sem íslenskur ráðamaður er þar í sviðsljósinu.

Skjálfandi.

Hér horfum við yfir Bakka, Héðinshöfði er tanginn fjær og Lundey fyrir miðri mynd ofarlega.


Héðinshöfði frá öðru sjónarhorni.

Horft yfir Skjálfanda að svokölluðum Víknafjöllum.

Kelduhverfi.

Tekið frá Skúlagarði í Kelduhverfi í átt að Vatnafjallgarði, oftast nefnt Tjörnes.


Lón í Öxarfirði, horfum í átt að Lónsósnum.

Horft yfir Kelduhverfið af útsýnispalli með góðum upplýsingaskiltum sem sjá má í forgrunni.

Öxnadalur.

Eyjafjörðurinn.

Eyjafjörðurinn alltaf glæsilegur.

Húnaver.

Alltaf gaman að mynda Húnaver, enda sérlega góðar minningar sem maður á þaðan.

Skagafjörður.

Hér horfum við út Skagafjörðinn, Sæmundarhlíð og Reykjaströnd blasa við, Tindastóll yfir 1000 metrar skagar hæst.

„Hálf 5-fréttir“ greiningardeildar ríkislögreglustjóra.

Björn Bjarnason, dómsmálaráðherra, hefur á bloggi sínu upplýst að á ríkisstjórnarfundi, s.l. föstudag, hafi hann kynnt frumvarp er feli í sér „að við embætti ríkislögreglustjóra og önnur lögregluembætti samkvæmt ákvörðun dómsmálaráðherra starfi greiningardeildir til að meta áhættu og sinna greiningu á því, sem tengist alþjóðlegri eða skipulagðri glæpastarfsemi og hryðjuverkastarfsemi".

Í fréttum hefur ráðherrann lýst því að slíkri greiningardeild megi líkja við greiningardeildir viðskiptabankanna og að leikfimisæfingar stjórnarandstöðu um að líkja þessu við leyniþjónustu séu með öllu ómálefnalegar.

Ég fagna mjög þessari yfirætlan ráðherrans, að fá fram alvöru spekinga til að rannsaka landráð og brot gegn stjórnskipan það er af hinu góða og hlakka ég mjög til að gerast áskrifandi að „hálf 5-fréttum" deildarinnar þar sem ég verð upplýstur um kaupin á eyrinni í undirheimum Reykjavíkur. Að vísu hef ég fyrirvara um að dómsmálaráðherra hafi sjálfdæmi um hvaða lögregluembætti hafi með höndum greiningu og mat á áhættu, þarna finnst mér að „Kínamúrarnir" eða „eldveggirnir" haldi ekki að öllu leyti.

En Danna í „greninu", Tobba „túkall" og Bjarna „glæp" verður hér eftir varla hlíft við stöðugum fréttum af markverðum atburðum og á DV-ið sjálfsagt eftir að fölna við hliðina á hálf 5-bloggi greiningardeildir ríkislögreglustjóra. Enda vonast maður til að geta fengið með milliliðalausum hætti greiningu og mat á áhættu að vera nálægt slíkum kumpánum sem og Danna, Tobba og Bjarna glæp.

Hér hefur dómsmálaráðherrann, Björn Bjarnason, hitt naglann á höfuðið, því að hver vill ekki fylgjast með gistináttafjölda hjá lögreglu, innflutningsspá, vaxtamöguleikum og uppgjörstímabilum. Það eru spennandi tímar framundan, það verður enginn sunnudagaskóli í undirheimum Reykjavíkur.

British Airways hefur áætlunarflug til Íslands.

Breska flugfélagið British Airways (BA) hefur tilkynnt að það muni í lok mars hefja áætlunarflug milli Gatwick og Keflavíkur. Stefnir félagið á að fara í harða samkeppni á Íslandsmarkaðnum og segjast vera komnir til að vera allt árið um kring. BA ætlar að halda úti ferðum fimm daga vikunnar á sumrin og fjóra á veturna.

BA mun ekki reka skrifstofu hér, farmiðarnir verða einungis seldir á vefsíðu þeirra, www.ba.com og þar geta farþegar sjálfir valið sér sæti í vélinni og síðan prentað út brottfararspjald sem flýtir fyrir við innritun í flugið.

Til að kynna sína vöru bjóða BA fyrstu tuttuguþúsund farþegunum helmings afslátt af fargjöldunum sem gildir fyrir flug fram í lok ágúst. „Megnið af viðskiptavinunum verða að öllum líkindum farþegar frá Bretlandi, einfaldlega vegna þess að það er mun stærri markaður,” sagði Sam Heine viðskiptastjóri BA á Norðurlöndum á blaðamannafundi í morgun.

„Við bjóðum upp á fulla þjónustu við okkar farþega, matur og drykkir áfengir og óáfengir eru innifaldir,” sagði Heine. Hann sagði að íslenski markaðurinn væri aðlaðandi fyrir BA því hér væru svo margir nettengdir. „Við erum ekki smeyk við samkeppnina, hún er góð fyrir viðskiptavininn sem fær aukið val á flugum og góð verð,” sagði Heine.

BA notar Boeing 737-400 á flugleiðinni og Heine sagðist fullviss um að margir Íslendingar myndu kjósa að fljúga með BA því þó að verðið væri kannski á svipuðum nótum og hjá öðrum flugfélögum eftir að kynningartilboðinu lýkur þá gætu BA boðið upp á góða þjónustu á vefnum og um borð í vélunum.

Fyrsta vélin lendir klukkan 9.45 þann 26. mars, verð á fari fram og tilbaka eftir að tilboði lýkur verður 22,900 kr. með sköttum. Boðið verður upp á tvö farrými og kostar farið á dýrara farrýminu 67,360 með sköttum.

Nú er þetta ekki í fyrsta sinn sem BA reynir fyrir sér á íslenskum ferðamarkaði því flugfélagið GO reyndi fyrir sér á þessari flugleið fyrir nokkrum árum, hver er munurinn á þessari tilraun? „GO var dótturfélag BA sem var lággjaldaflugfélag sem við reyndar seldum síðan með góðum hagnaði, en BA stefnir á að þjóna þessum markaði allt árið og lítum á það sem ákveðna skuldbindingu,” sagði Heine

Heimild: mbl.is

- - - - -

Verð að segja að þessar fréttir kæta mig mikið, enda um fyrstaflokks flugfélag að ræða. Veit a.m.k. af einni ferð sem ég fer í sumar, jæja svona helmingslíkur á henni vona ég.